កំណាព្យខ្មែរ

បានត្រឹមសោកា

ដោយ៖គឹមសុខា

រាល់ឆ្នាំបានត្រឹមអ្នកជូនពរគេ

បែភគ្រ្តងាករេមើលខ្លួនឯងវិញ

បានត្រឹមសោកាចិន្តាទោម្នេញ

វាចាហូរចេញ"សូមសុខសប្បាយ"។

ជូនគេច្រើនពេកចំណែកខ្លួនឯង

នៅសល់ចំបែងរែងរួមខ្វល់ខ្វាយ

ក្នុងលានរោងការវាចាក្អាក់ក្អាយ

ស្តាប់គេនិយាយចំអកខ្ញុំថា។

"គេការអស់ហើយណា៎មិត្តសំឡាញ់

ចំណែកឯងវិញតើដល់ពេលណា?

បានឆីក្បាលជ្រូកក្រេបទឹកសុរា

ប្រាប់ខ្ញុំផងណា៎កុំនៅបង្អង"។

ពេលនោះខ្ញុំភាំងកាំងស្មារតី

ដាក់មុខចុះដីចិត្តត្រឹមសៅហ្មង

ហើយប្រឹងហារស្តីបន្លំអ្នកផង

អីទេប្អូនបងពេលដល់ដឹងហើយ។

ពេលនេះបានត្រឹមចិត្តសោកា

ស្រពោនចិន្តាទុក្ខឥតស្បើយ

ទឹកភ្នេកឯកាធ្លាកទៀតហើយ

ដំណាងចម្លើយចិត្តសោកា៕

ពាមបួន-កូនក្អែក,១០.១០.២០១០