កំណាព្យខ្មែរ

ផ្តើមសេចក្តី

(ពាក្យ៨)

ចាប់ផ្តើមកវីខ្ចីដងប៉ាកកា រៀបតួអក្ខរា ព្យញ្ជនៈខ្មែរ

លំដាប់លំដោយមានជាហូរហែតាមមលំអានខ្មែរបូរាណសម័យ។

សេរតាមចំណេះខ្លួនត្រិះរិះបាន ផ្អែកលើវិធានពាក្យខ្មែរមានន័យ

សង្ឃឹមញាតិមិត្តឥតមានសង្ស័យ ចំណងដៃប្រពែញាតិមិត្តមូរមី។

ឈ្មោះខ្ញុំផ្តើមមានព្យញ្ជនៈ “ខ” ក្នុងក្រមអក្សរខ្មែរតួទីពីរ

ផ្សំ “ា​” និស្ស័យមានន័យសោភី ក្នុងតួនាទីបំពេញអត្ថា។

ដូច្នេះ ខ្ញុំ សូមថ្លែងលើបន្ទាត់ ដែលមានអត្ថបទតាមសព្ទខេមរា

លាយឡំផ្សំពាក្យទៅតាមវោហារសង្ឃឹមខ្លឹមសារបានញាតិរាប់អាន។

ខ ខ្ញុំសរសេររិះរេសេចក្តី កំណាព្យវែងខ្លីជូនជាកំសាន្ត

អានចុះញាតិមិត្តកុំបីខកខាន ពេលសំរាន្តអានកំសាន្តអារម្មណ៍។

ទាំងនេះសេចក្តីខ្ញុំបានថ្លាថ្លែង ចិត្តនៅភ័យក្រែងកូនកាព្យមិនសម

មិនទានសម័យយុវវ័យនិយម ទាស់ចិត្តចាស់ទុំគុំក្នុងចិន្តា។

ម្លោះសូមសន្តោសប្រោសប្រណី សំណាក់ប្រុសស្រីជាតិខេមរា

ក្រែងជាជ្រុលជ្រួសហួសខុសធម៍អាថ៍មិនមានខ្លឹមសារអប់រំគំនិត។

អវសាន្តសូមសន្តានបានក្តីសុខនានាភូមិស្រុកគ្រប់ញាតិឆ្ងាយជិត

​​​បានជួបពុទ្ធពរបវរល្អពិត ព្រះទ្រង់ប្រសិទ្ធមានបួនប្រការ។

អាយុ វណ្ណៈ សុខៈពលៈ បានជួបប្រទះសព្វទិនទិវា

បារមីគុណព្រះសូមមករក្សា ដល់ជាតិខេមរាសុខរៀងទៅហោង៕